Wee Joukydaidles,
Toddlin' out an' in :
Oh but she's a cuttie,
Makin' a sair din !
Aye sae fou' o' mischief,
An' minds na what I say :
My verra heart gangs loup, loup,
Fifty times a-day !
Wee Joukydaidles -
Where's the stumpie noo ?
She's peepin' thro' the cruivie,
An' lauchin' to the soo !
Noo she sees my angry e'e,
An' aff she's like a hare !
Lassie, when I get ye,
I'll scud ye till I'm sair !
Wee Joukydaidles -
Noo she's breakin' dishes -
Noo she's soakit i' the burn,
Catchin' little fishes -
Noo she's i' the barn-yard,
Playin' wi' the fouls ;
Feedin' them wi' butter-bakes,
Snaps, an' sugar-bools.
Wee Joukydaidles -
Oh, my heart it's broke !
She's torn my braw new wincey
To mak' a dolly's frock -
There's the goblet owre the fire !
The jaud ! she weel may rin !
No a tattie ready yet,
An' faither comin' in !
Wee Joukydaidles -
Where's the smoukie noo !
She's hidin' i' the coal-hole
Cryin' "Keekyboo !" -
Noo she's at the fireside,
Pu'in' pussy's tail -
Noo she's at the broun bowl,
Suppin' a' the kail !
Wee Joukydaidles -
Paidlin' i' the shower -
There she's at the windy !
Haud her, or she's owre !
Noo she's slippit frae my sicht :
Where's the wean at last ?
In the byre amang the kye,
Sleepin', soun' an' fast.
