There's something sair camstairy in
the turn things tak'.
It's never but on Sawbath that the
spunks rin dune;
'Twas aye when I taiglet that my
shae-lace brak;
The coalman never draps his price
till our cairt's in.
I couldna cowp my cup but on a split
new gown;
I never saw it better - it's the way
a' roun!
My oven never fails me but when in
steps Sal -
I ken what she is thinkin' though
she aye keeps mim;
Miss Clipper never ca's but when my
room's reel-rall,
And never bides for tea but when the
bread-crock's toom.
Our invitations come in threes - sae
that baurs twa;
I never saw it better - it's the wey
owre a'!
When Peter's busy balancin' it's
keen, clear frost:
When he looks out his curlin' stanes,
the thow blaws grey;
If I put aff my washin' it's a gran'
win' lost;
But if we plan an outin' it's a
dreep a' day.
The week before and afterhin' the
sky bides blue -
I never saw it better - it's the wey
a' through!
It maun be when my curtains hae been
new washed white,
The sweep mistak's and plumps his
sooper down oor lum;
There's naething seems to rule the
worl' but just fair spite;
It's when we're pack't for Ro'sey
and the cab maist come,
Wee Jean maun tak' her measles - and
it's aff we canna get her;
That simmer, ye may guess, was fine
- I never saw it better!
