|
Thir
cheptours that eftir follouis explanis the thretnyng ande menassing of
gode contrar obstinat vicius pepil.
Chap. II
It is
vrityne in the .xxviii of deutronome thir vordis.Gyf thou obeyis nocht the
voce of the lorde thy gode, ande kepis nocht his ordinance thir
maledictions sal cum on the, thou sal be cursit on the feildis, thou sal
be cursit in the cite, the lord sal send maledictione ande tribulatione on
al thy byssynes. the lord sal sende pestilens on the, the heyt feueir,
droutht, the sourde, tempest ande all euil seiknes, ande he sal persecut
the, quhil he hef gart the perise, thou sal thole iniuris & spulze, ande
ther sal be na man that can saue the. thou sal spouse ane vyfe, bot ane
vthir sal tak hyr fra the be forse. thou sal big ane house bot thou sal
neuyr duel in it. thy ox sal be slane befor thy eene, & thou sal get nane
of hym tyl eyt. thy flokkis of scheip sal be gyffin to thy enemeis, the
oncoutht ande straynge pepil sal eyt the frute of the eyrd that thou hes
lauborit. Leuic.xxvi. <f20r> moyses sais be the spreit of gode, gyf ze
obeye nocht my command i sal visee zou vitht dreddour, vitht fyir ande
vitht suellieg, ze sal sau the cornis on zour feildis, bot zour enemeis
sal eit it, zour enemeis sal be zour masters, ande ze sal flee fast for
dreddour, quhen ther sal be litil dangeir, & there sal be no man
follouuand zou, ande gyf ze remane obstinat ande vil nocht be correckt, i
sal strik zou vitht ane plag, seuyn tymes mair vehement, for i sal gar the
sourde cum on zou to reuenge my alliance, ande quhen ze ar assemblit
togyddir vitht in zour tounis, i sal send the pestilens amang zou, ande i
sal delyuir zou in the handis of zour enemeis.
It is
vritin in the thrid cheptor of esaye thir vordis, behold the dominator
ande the lorde of armis, the quhilk sal tak fra hierusalem ande fra iuda,
the mychty, ande the sterk man, the victuelis ,the men of veyr, the iugis,
the precheours. i sal gyf them zong childir to be ther kynges. ande
effemenet men sal be ther dominatours, ande the pepil ilk ane sal ryise
contrar vthirs, ande ilk man sal be aduersair tyl his nychtbour, zong
childir sal reproche ald men, ande mecanye lauberaris sal reproche <f20v>
gentil men. Esaye III.
|
