A've aften hard it said afore,
Keir Hardie wadna ligg sae douce
ablo the mouls gin he coud see
the gowks his Pairtie herbors nou.
A hae hard tell anaw that at
the tyme thay hansil Parliement,
thay hae ane unco chiel, Blek Rod,
that thryce maun chap the chaumer dure
afore thay mak ti lat him in;
an forby this, begairtert hochs,
bewiggity heids an baubils bricht,
haigilt aroun wi mukkil mass.
At ae sic tyme afore the War,
McGovern frae reid Shettleston,
raired out - asyde himsell -’‘For God's
Sake, stap this humbug, for at hame,
the-nou, ma puir constituents
is aw but stervin, sae thay ir!
Ye may be shuir thay warna lang
or thay frogmaircht him out the houss,
richt smert, Scotch skoundril that he wes.
But youn wes aw langsyne
whan fowk stil myndit o
the gleid in Hardie's ee.
The'r nae McGoverns nou
nor ir the lyke ti be!
